زحمة السيارات في الصباح

من الأماكن المزدحمة وخصوصاً في الصباح

الدائري الشرقي بالرياض

والله من زين المزاج على الصبح لا ويزيد الطين بلّه  إن الطريق مزحوم

إي والله .. لو تلتفت عن اليمين وعن الشمال لرأيت وجوهاً عابسة مقمطرةً غالبها تحمل الشر وصدورها ضنكه وضيقه لاتتسع إللا لنفث الدخان

أعوذبالله صدق يعطيك وجهه إن نظرت إليه في محض الصدفه إنطباعاً وانت تبلع ريقك إنه لو إنفرد بك لشلخك إرباً إربا

قمة في ضيقة الصدر طبعاً يزداد ذلك التجهم مع زيادة الزحمة

اليوم الإربعاء إضطريت بأن أوصل أبنائي إلى مدارسهم حيث أن السائق يمر بظروف وصاير مثل البقرة المستحيله مادري وش بلاهـ مايتكلم ولايتزحزح من مكانه ولو تسحبه عشرين متر واطلقته رجع لمكانه لو تجلده بخيزرانه مايقول أححح تبرد بها كبدك مطابقاً لهذا المثل اللي يقولونه الأولين مثل البقرة المستحيله لو تصب عليها قاز وتولع بها ماتحركت من مكانه مادري هي منغثه ولزقن على كبدها شي آكلته يمكنها متزيلقه البارحه واكلت شي ولم يبرح الأكل من مكانه ... مادري المهم المستحيله يقولون انها منغثه مكثرتن الأكل وشربت ماء وانبشمت بهالحاله أعتقد إنهم يشربونها بيبسي يخرط اللي هي متزيلقتن وآكلته عساها ماتحدره .. آمين

المهم أنه لابد من المرور عبر الطريق الدائري إلى مخرج 9حيث مدارس الرواد الأهليه

تبون الصراحة عذرت ذوات الوجوه المتجهمه على تجهمهم بوجوه اللي مايدرون وش السالفه

الطريق إلى مخرج 9 بالعاده إن كان لايوجد زحمه أو غير الصبح وأوقات الذروه تقريباً تقطعه إن زاد تقطعه بسيارتك بـ10 دقائق

اليوم علمت  لماذا ترتسم تلك اللوحات الوحشية في وجهوه بعض البشر 

وبدأت ترتسم على وجهي بعض العلامات السابقة الذكر لمن يواجه مثل هذه الزحمة طيلة مشواره الوظيفي

وبدأ يضيق على إثرها صدري

حتى أنه يسمع منّي بعض الحروف الغير مفهومه من لدى أبنائي ( قاعدن أحضرم ماهنا حل إللا الحضرمه )

حتى كدت أن أخرج رأسي من نافذة السيارة وأصرخ صرخة  تطفيء بعضاً من الغضب الذي سيطر عليّ

ياناس حرام اللي يصير هذا صدق عيب والله كل هالميزانيات وكل هذه السعة بالمدينه وبالطرق وكل هذ المقدره الماليه على وضع جسور وأنفاق وساكتين وكأن الامر لايعنيكم

ياناس معقولة طريق تستطيع أن تقطعه بغير أوقات الذروه بعشر دقائق ، تقطعه بأوقات الذروه بساعة ونصف إلى الساعتين ؟!!

تأخرت عن دوامي وتأخروا أبنائي عن مدارسهم وتعطلت أشغال العالم المزحومه وبالاخير يقولون لماذا لاتخرج قبل موعدك بربع ساعة كي لايشطب على مكان توقيعك

طلعنا بزود نصف الساعة ومازال الزحام موجوداً وبالخصوص على الدائري الشرقي العريض والمزدحم من مخرج 17 إلى مخرج 9والله ما أقولها لمجرد مليء هذا المتصفح لا والله أقولها بكل صدق

يامسؤلين ابحثوا لمرتادي هذه الطرق المزحومه عن حل قبل ان يتفشى أرتفاع الضغط والسكر عند غير المبالين

ومع هالزحمة ضحكت يوم تذكرت نكتة المحشش

طاح المحشش بحفره عميقة وجلس يحاول الخروج منها بكل الطرق

وما أن عجز عن الخروج وتعب من كثر المحاولات

قال وبصوت مرتفع

هذي آخر محاوله وان ماقدرت أطلع والله لا أروح

وين تروح ينن عين أمك

وانت داخل الحفره

صدق وين يبي يروح اللي داخل زحمة الدائري او أي مكان مزحوم بالسيارات

أعتقد أن الآن ليس لدي ما اقوله ربما أكمل وربما هي هكذا نهاية الحمقه

لم أراجع ما كتبت

نصوص بحكمة لقمان

• يا بني ! ارج الله رجاءً لا تأمن فيه مكره، وخاف الله مخافة لا تيأس بها رحمته.
• يا بني ! أكثر من قول : رب اغفر لي، فإن لله ساعة لا يُردُّ فيها سائل.
• يا بني ! إن العمل لا يستطاع إلا باليقين، ومن يضعف يقينه يضعف عمله.
• يا بني ! إذا جاءك الشيطان من قبل الشك والريبة فاغلبه باليقين، وإذا جاءك من قبل

السآمة فاغلبه بذكر القبر والقيامة، وإذا جاءك من قبل الرغبة والرهبة فأخبره أن الدنيا مفارقةُ متروكة.

• يا بني ! اتخذ تقوى الله تجارةً، يأتيك الربح من غير بضاعة.
• يا بني ! إياك والكذب، فإنه شهي كلحم العصفور، عما قليل يقلى صاحبه.
• يا بني ! لا تأكل شبعاً على شبع، فإنك إن تلقه للكلب خيرٌ من أن تأكله.
• يا بني ! لا تكن حلواً فتبلع، ولا مراً فتلفظ.
• يا بني ! لا تؤخر التوبة فأن الموت يأتي بغتة.
• يا بني ! اتق الله، ولا تُر الناس أنك تخشى الله ليكرموك بذلك وقلبك فاجر.
• يا بني ! ما ندمت على الصمت قط. وإن كان الكلام من الفضة كان السكوت من الذهب.
• يا بني ! اعتزل الشر كيما يعتزلك، فإن الشر للشر خلق.
• يا بني ! اختر المجالس على عينك، فإذا رأيت المجلس يُذكرُ الله عز وجل فيه فاجلس معهم،

فإنك إن تك عالماً ينفعك علمك وإن تك عييًّا يعلموك، وان يطلع الله عز وجل إليهم برحمة تصبك معهم.

• يا بني ! ليكن لك علو الهمة في طلب الجنة والعزم للشهادة في سبيل الله.
• يا بني ! انصب رايتك راية الحق ورباطك في سبيل الله خير من خير في الدنيا.
• يا بني ! انزل نفسك منزلة من لا حاجة له بك ولا بدَّ لك منه.
• يا بني ! إن الحكمة أجلست المساكين مجالس الملوك.
• يا بني ! جالس العلماء وزاحمهم بركبتك، فإن الله ليحيي القلوب الميتة بنور الحكمة كما يحيي الأرض الميتة بوابل السماء.
• يا بني ! امتنع مما يخرج من فيك، فإن ما سكتَّ سالم وإنما ينبغي لك من القول ما ينفعك.
• يا بني ! إنك منذ نزلت إلى الدنيا استدبرتها واستقبلت الأخرى. فدارٌ أنت إليها تسير أقرب من دارٍ أنت عنها تباعد.
• يا بني ! إياك والدَّين، فإنه ذلُّ النهار همّ الليل.
• يا بني ! لا يأكل طعامك إلا الأتقياء، وشاور في أمرك الحكماء.
• يا بني ! من كذب ذهب ماء وجهه، ومن ساء خلقه كثر غمه.
• يا بني ! نقل الصخور من مواضعها أيسر من إفهام من لا يفهم.
• يا بني ! إعلم بأن الجهاد ذروة سنام الإسلام.

المصدر ويكيبيديا شارك وعدل وأعد صياغة موضوع لقمان الحكيم
رابط وكيبيديا .. لقمان الحكيم

مواقف محرجه (1)

بعض المرات أكون جالس ومعي كم شخص
لكن تاخذني الهواجيس يمين شمال فوق تحت يعني يكون جسمي معهم
وعقلي بعيد وتصدف بعض المرات يمر على بالي موقف والقى نفسي أضحك أو ابتسم لاشعورياً أو تخرج بعض بدايات القهقه الخفيفه أو صوت فحيح (ههه داب )
ويلتفت علي أحدهم ويقول ياخي ضحكنا معك وشتضحك عليه ؟
وبعض من المواقف هي :

وصلت للبيت متأخر ، تقريباً بقى على آذان صلاة العصر ساعة إللا نص يعني نص ساعه
وانا أعرف نفسي هالمده إذا نمت فيها يا اقوم نفسي براس خشمي واصير تقل قعره ما أنتحارش ودون الدون أهاوش عليه
حتى لو صليت يمكن أخقل الإمام واقنعه بالمايكرفون إذا أبطى ماركع وأخوف ما أخاف منه إن سجد وبالعاده يطول إمامنا أخاف انام وانا ساجد وتروح عليّ نومه عاد شف الفشيله لو سلم الإمام وانا ساجد وين أودي وجهي من المأمومين لو قال واحد منهم صحّوا هاللي نايم وقلوله لايجي يصلي تسانه يبي ينام ياكرهي للي يهرج تسذا ياحلالات النباطه

أتخيل نفسي أسمعهم يقولون صحوا هالآدمي عاد وشلون ابقوم ووريهم وجهي أنا افكر الحين لو صارهالموقف إني أتلطم ووجهي للأرض واقوم واعرج وأغير شكل مشيي علشان مايعرفونّي مع إني أبصم بالعشرة إن أبو عبدالله يبي يعلمهم ويقول هذا سلمان بس مهيب عادته إنه ينام أسكت ياخي مهوب لازم تقول شي .....
المهم يوم جيت للبيت وشفت إني متأخر ومايمدين أنام جلست وعروق عيوني بارزات واطراف العيون حمر ويبدن يتعازمن على من هي
اللي تسهر وخويته تنام لمين الله يسهل الأمر وياذن أبوعبالله العصر أذن بعد ربع ساعة من الجهاد توضيت ورحت للمسجد
يوم جلست وتركيت ويجي بجنبي واحد ماأعرفه أول مره أشوفه بالمسجد صراحة شكيت في أمره حسيت أنه يبي شي أشوفه بس يناظرني تقل يبي يهرج والله واروح أجيب مصحف على شان أبعد عنه شوي (ترى أنا موعود دائماً باليمنيين اللي يشحذون ، يعني فاهم الامر وما تمر عليّ هالحركات)
مرة واحد من اليمنى كم مره اشوفه ومشغلن كد فكرت إني أترك هالمسجد علشانهم يوم شفته تقل ينشن عليّ من بعيد
ناوي نية شحاذه سبقته وقلت له معك عشرين ريال ابي أعبي بانزين .. أنصدم ولف يمين ولا قال شي وراح وخلان .
المهم جلست أقرأ شوي وبدا راسي يثقل تقل صار النوم أشد من يوم أنا بالبيت حطيت المصحف بالمكان المخصص قلت خلني أتكي على العمود شوي والله وآخذلي غطه أذكر إني أناظر الثريات الكبار وانا مفتح عيوني بكل ما أوتيت من قوة على شان ما أنام!؟
(تذكرون نكته السودانيه إللي بأولى إبتدائي ياحول يضحكون عليه المسيكينه اللي شادة أمها شعرها على ورا ومن قوة الشد طايرات عيونه  واللي يشوفه يحسبه هي مفتحة عيونه من الشطاره على شان ماتفرك أي معلومه إللا شايفتها )
لكن مادريت إللا وانا أشخرررر بصوت قويييي من قوته نزّيت من روحي والتفت على اللي حولي وأثرهم مهوب لمّي مادري يا أنا أحلّم وللا هم صقهان هالموقف خلاني ما أضبط صلاتي أعوذ بالله كل شوي مارن عليّ صوت شخيري واضحك على نفسي أعوذ بالله من الشيطان الرجيم راحت الصلاة كلها ضحك بيني وبين نفسي حتى لو تسمعون صوت الشخير شخير مهوب طبيعي تقل شي ينكسر ... والحمدلله رب العالمين الله لا يواخذنا بما فعله شخيرنا بنا..

الموقف الثاني أيضاً بالمسجد
يتهيألي إني شيبت صدق وبديت أنسى وانام على روحي خخخ
يوم سلم الإمام سلمت وقعدت شوي وقمت واطلع من المسجد يوم أنتصفت بالطريق واحس برجليني إنهن يمشن على الأرض ومابه واقي مابين رجليني
ومابين الأرض أثري ناسين ألبس نعالي وانتم بكرامه صدق شيبت !! وللا هواجيس؟؟
لكن ماكنت أفكر بشي يومها !
المهم
يوم حسيت إني ماعليّ نعال أعزكم الله حسيت إن الناس كلهم يناظروني وعلى طول بديت أتلفت تسني أدور شي بالأرض وادخل يديني بمخباتي وأهزها وارجع ادخل المسجد وبرضه تسني أدور بين دروج الأحذيه أعزكم الله ... خلاص دريو الناس إنك تدور شي البس نعالك ورح للبيت وتروش عن حر الفشيله .. طبعاً أقول لنفسي هالحتسي علشان أعطين دافع على شان ارفع راسي عن التدوير بالأرض اللي تقل قزازه من نظفه مابه شي وش تدور خلاص رح لبيتكم يالشايب وهه اويتلي    ... مع السلامه   

---

سبحان الله وبحمده
.... عدد خلقه ... ورضا نفسه .... وزنة عرشه .... ومداد كلماته ....
---------------------------------
أستغفر الله الذي لا اله الا هو الحي القيوم واتوب اليه
أستغفر الله الذي لا اله الا هو الحي القيوم واتوب اليه
أستغفر الله الذي لا اله الا هو الحي القيوم واتوب اليه

في المواقف المحرجه نردد (( عسى فرجاً قريباً عسى ))

بعض الأحيان يريد الشخص ان يتحدث أمام زملاءه بكلمة أو سالفة أو يريد أن يطرح فكره فما أن يبدأ إللا وتتغير الحال الذي كان عليها وتصبح الفكره غير جيده بنظره !!
أو الكلمة التي كان يريد طرحها ليس هذا وقتها وما أن يبدأ إللا وتبدأ الأفكار تتصادم والرغبات تتخاطم    !؟

مع أني شاهدت الرضى بأعينهم وما أن وجدت نفسي قد أنزنقت بتلك القصة
إللا وابحث عن مخرج 

------

كما حدث لي اليوم وجدت نفسي في مأزق ،

كنّا نحن اربعة قال أثنان منهم مواقف حدثت لهم

فلما جاء دوري كنت سأقول ذلك الموقف الذي حددته قبل أن يبدأ الثاني

 وما أن بدأت إلا وقد تغير الوضع   

 أحسست أن هذه القصة لاتصلح لهم والمكان أيضاً لايساعد على البوح بكل مجريات تلك القصة ، واحداً من الموجودين      لا أستطيع ان اقول كل مافي هذه القصة امامه

صاحب فهم خاطيء  ولاينسى الذي قيل له 

وليس عنده شي اسمه ( مهوب هذا وقته  ) يعني ممكن يذكرك بهذه السالفه بأي مكان
وبحضرة أي شخص  ، المهم أحسست بفقدان التوازن  ، وأرى الأعين من حولي قد برزت من مكانها  تحكي عن رغبتهم بأن أكمل ذلك الموقف  ، ماعلموا أنني أبحث عمن ينقذني من هذا الموقف  وخاصة أنني بدأت بقفز بعض من المجريات المهمه  ، واصبحت القصة في داخلي انها كلمات متقاطعه ، فجأه ، أختلف لوني وصعبت خطوتي فجأه وصلتني رساله صوتها يقول :

عزيزي لديك رساله ،

هنا تراقص أمام عيّنيّ فرجاً عظيماً

وبدأت وكأني اقرأ الرساله
وانا اراسل أحد العزيزين لدي وأقول له أتصل علي بسرررعه (تكفى    ).
لم تمض ثواني إللا وقد فرجت  نعم فرجت لقد اتصل عليّ      

   أخرجت الجوال من جيبي مرة أخرى وسحبت نفسي خارج الغرفة    

وبدأت أمطط الوقت وكأني احادث أحداً مهماً أغلقت الهاتف رجعت إليهم معتذراً     بأنني سأعود لعملي مضطراً
وعلى هذا  عاهدت نفسي بأن اربط لساني بلهاتي ولا أشمرعن شفايفي في حضرة تلك الإذاعات
التي لاتعلم متى تتكلم ومتى تسكت والتي تُحّور الكلم عن موضعه وتفهم ماتريد فهمه على  هواء نياتها      .